სსიპ   საქართველოს   ოლიმპიური  რეზერვების  მზადების  ეროვნული  ცენტრი

საქართველოს ნაკრებმა 2016 წლის სამი ლიცენზიის მოპოვების შანსი შეინარჩუნა

ყაზახეთის ქალაქ ალმათიში დამთავრდა ძალოსანთა სალიცენზიო მსოფლიოს ჩემპიონატი, რომელშიც საპრიზო ადგილებისთვის 72 ქვეყნის წარმომადგენლები იბრძოდა.

აზიურ ფიცარნაგზე საკუთარი ძალები საქართველოს ექვსმა ათლეტმა მოსინჯა. ყველაზე წარმატებულად მძიმე წონაში (+105) ევროპის ბრინჯაოს პრიზიორმა ირაკლი თურმანიძემ იასპარეზა: მან 195 კილო აიტაცა და 227 კილო აკრა, ორჭიდში 422 კილოგრამი მოაგროვა და მე-6 ადგილი დაიკავა.

უმძიმეს წონით კატეგორიაში ჩემპიონი რუსი რუსლან ალბეგოვი (462 კგ) გახდა, ვერცხლის მედალი ირანელ ბეჰდად სალიმიკორდასიაბის (457 კგ) ერგო, ბრინჯაო კი – ეგვიპტელ მოჰამედ ეჰშან ატია მასუდს (436 კგ).

მანამდე, 105 კგ-ში გია მაჭავარიანი 23-ე ადგილზე გავიდა, ალბერტ კუზილოვმა კი აკვრაში სამივე ცდა გააფუჭა და საერთო შედეგი ვერ დააფიქსირა, შეუფასებელი დარჩა გილორგი ლომთაძეც (77 კგ).

95 კილოგრამ წონით კატეგორიაში 22-ე ადგილზე გავიდა ოლიმპიური ცენტრის აღზრდილი სპორტსმენი ნიკა ნანაძე. რამინ შამილიშვილმა (62 კგ) კი მე-20 ადგილი დაიკავა და გუნდს 5 ქულა შესძინა.

სულ საქართველოს ნაკრებმა 29 ქულას მოუყარა თავი და 26-ე ადგილზე გავიდა, რაც გუნდს რიოს 2016 წლის სამი ლიცენზიის მოპოვების შანსს უნარჩუნებს.

ალმათიში გუნდური პირველი ადგილი 139 ქულით ჩინელებმა დაიკავეს. მეორე-მესამე ადგილები მასპინძლებსა (136 ქულა) და კორელეებს (135 ქულა) ერგოთ.

<< დაბრუნება

2014-11-17