წლევანდელ მსოფლიო რბენაში მონაწილეობის მისაღებად საქართველოში 5695 ადამიანი და ორასამდე კომპანია დარეგისტრირდა, რაც აქამდე არ მომხდარა. აღსანიშნავია, რომ მსოფლიოში ყველაზე ასაკოვანი მორბენალი სწორედ ქართველი იყო: 93 წლის შოთა სამუშია, რომელმაც შარშან 3,5 კილომეტრი დაფარა.

Wings for Life World Run-ის უნიკალურობა იმაში მდგომარეობს, რომ არ არის განსაზღვრული ტრასის მანძილი და დრო, არ არსებობს ტრადიციული ფინიშის ხაზი. არის მხოლოდ „ფინიშ მანქანა", რომელიც სტარტიდან 30 წუთში იწყებს მოძრაობას და 15კმ/სთ - 20კმ/სთ - 25კმ/სთ სიჩქარით დადის. თუ „ფინიშ მანქანა" მორბენალს გადაუსწრებს, ის შეჯიბრს გამოეთიშება.

საქართველოში ზედიზედ მესამედ გამართული რბენის კეთილი ნების ელჩები ცნობილი სპორტსმენები იყვნენ: სეულის ოლიმპიადის პრიზიორი, სპრინტერი მაია აზარაშვილი, რომელიც ამავდროულად ღონისძიების სპორტული დირექტორიც გახლდათ; საქართველოს 2015 წლის საუკეთესო სპორტსმენი, მსოფლიოს ჩემპიონი, მოჭიდავე ლადო ხინჩეგაშვილი; ევროპის ჩემპიონი ძიუდოისტი ვარლამ ლიპარტელიანი; ვეტერანი კალათბურთელები ვლადიმერ ბოისა და კოტე ტუღუში; ავტომრბოლელი მევლუდ მელაძე; ვეტერანი მოცურავე ჰენრი კუპრაშვილი.

მიუხედავად სხვადასხვა ადგილობრივი დროისა და კლიმატური პირობებისა, მარათონი 6 კონტინენტის 33 ქვეყანაშივე ერთდროულად დაიწყო. სულ მონაწილეობა 100 000–ზე მეტმა მორბენალმა მიიღო.