ოლიმპიური ცენტრის ისტორია 1958 წელს იწყება.

ცენტრი ისტორიულად გამორჩეული სპორტული ტრადიციების მქონე ორგანიზაციაა, რაც ნახევარ საუკუნეზე მეტი ხნის განმავლობაში სპორტის ოლიმპიურ სახეობებში მიღწეული წარმატებებით დასტურდება, 3 ოლიმპიური ჩემპიონი და 2 პრიზიორი ამ ცენტრის ისტორიისა და ტრადიციების სიმბოლოა.

2018 წელს ინფრასტრუქტურული პროექტების ინიცირება მინისტრ მიხეილ გიორგაძესა და დირექტორ ბორია ფირცხელიანის მიერ მნიშვნელოვანი ნაბიჯი იყო ცენტრის გადარჩენისთვის. არსებული შენობა-ნაგებობების ავარიული მდგომარეობა მართლაც დიდ დაბრკოლებას წარმოადგენდა მომავალი თაობებისთვის ხარისხიანი სასწავლო-საწვრთნელი გარემოს უზრუნველსაყოფად. თუმცა, 2019 წელს სამინისტროს სტრუქტურული ცვლილებების გამო პროექტის აქტიური მიმდინარეობა შეფერხდა.

მიუხედავად ამისა, ოლიმპიური ცენტრი არ წყვეტდა ძალისხმევას დაგეგმილი პროექტების განხორციელებისათვის. ცენტრისთვის სერიოზულ საფრთხეს წარმოადგენდა მისი ტერიტორიისთვის საცხოვრებელი სტატუსის მინიჭების საკითხი, რაც შესაძლოა სპორტული ბაზის ფუნქციის დაკარგვის წინაპირობად ქცეულიყო. ცენტრის მიერ საკუთარი ფუნქციის დაცვისა და სპორტული ბაზის მრავალწლიანი ისტორიის შენარჩუნებისთვის გადადგმული ნაბიჯები არა მხოლოდ მომავალ თაობებს აძლევს სტაბილურობის გარანტიას, არამედ მის ტრადიციებსაც სამომავლოდ უფრო მყარად განამტკიცებს.

არსებული სირთულეების მიუხედავად, 2023-2024 წლებში ბატონ ბორია ფირცხელიანისა და მისი გუნდის ერთობლივი ძალისხმევით, მინისტრ თეა წულუკიანის მხარდაჭერით, საფუძველი ჩაეყარა ოლიმპიური ცენტრის მასშტაბურ პროექტს ,კერძოდ, განხორციელდა 7 მილიონი ლარის ინვესტიცია სპორტსმენთა საცხოვრებელი კორპუსის სარემონტო-სარეაბილიტაციო სამუშაოებისთვის, აშენდა ახალი ძიუდოს დარბაზი, აგრეთვე, მრავალპროფილური სპორტული ნაგებობა, სადაც გათავსდება კრივის, ფარიკაობისა და მშვილდოსნობის სივრცეები. აღნიშნული პროექტები ნამდვილად ტოვებს შთაბეჭდილებას, რომ ცენტრის ისტორიული ფუნქცია მხოლოდ შენარჩუნებული კი არა, მნიშვნელოვნად გაძლიერებულიც იქნება!

2024-2028 წლების პროგრამის ფარგლებში დაგეგმილი პროექტები კი კიდევ უფრო მეტ შესაძლებლობას იძლევა: არა მხოლოდ ინფრასტრუქტურის განახლებისთვის, არამედ სპორტის ახალი სახეობების დამატებით (ფეხბურთი, კალათბურთი), რომლებიც მეტად მრავალფეროვან და საინტერესოს გახდიან სპორტულ ბაზას. არსებული ავარიული შენობის დემონტაჟი და საერთაშორისო შეკრებებისთვის განკუთვნილი სასტუმროს მშენებლობა, ასევე ჭიდაობისა და ძალოსნობის დარბაზების მოდერნიზება, აუზი მშენებლობა, ხაზს უსვამს მიზანს, რომ ცენტრმა საერთაშორისო სტანდარტებს უპასუხოს. აღნიშნული პროექტების წარმატებაში მნიშვნელოვანი იქნება სპორტის სამინისტროს ფინანსური მხარდაჭერა.

დღეის მდგომარეობით, ცენტრის წინაშე მდგარი ყველა ძირითადი გამოწვევისა და განვითარების შესაძლებლობის გათვალისწინებით, ცენტრი კვლავ განაგრძობს სვლას დასახული მიზნებისკენ - ბატონი ბორია ფირცხელიანის აქტიური ჩართულობა, იდეების დასახვიდან მათ განხორციელებამდე, აჩვენებს, რამდენად მნიშვნელოვანია მიზანმიმართული ლიდერობა და გუნდის ერთობლივი ძალისხმევა ასეთი მასშტაბური მიზნების მისაღწევად. ცენტრის მუდმივი განვითარება ემსახურება არა მხოლოდ ტრადიციის შენარჩუნებას, არამედ თანამედროვე სპორტული მოთხოვნების დაკმაყოფილებასაც.